Արմինֆո. Հայաստանը մեծ նշանակություն է տալիս միջուկային էներգիայի խաղաղ օգտագործման ոլորտում անվտանգության նպատակներին և ԱՊՀ մասնակից երկրների հետ միջուկային և ռադիացիոն անվտանգության ոլորտում համագործակցության հետագա ամրապնդմանը:
Այս մասին հունվարի 12-ին Տարածաշրջանային և եվրասիական ինտեգրման հարցերի մշտական հանձնաժողովի նիստում հայտարարել է ՀՀ տարածքային կառավարման եւ ենթակառուցվածքների նախարարի տեղակալ Հակոբ Վարդանյանը ՝ ներկայացնելով <Ռադիոակտիվ աղբյուրների տեղափոխման հարցերով Անկախ պետությունների համագործակցության մասնակից պետությունների տեղեկատվական փոխգործակցության մասին> համաձայնագիրը վավերացնելու մասին նախագծը։
Նախարարի տեղակալն ընդգծել է, որ 2016 թվականի հունիսի 7-ին ստորագրված համաձայնագրի վավերացումը նախատեսում է ԱՊՀ պետությունների միջև տեղեկատվական փոխգործակցության ապահովում մի երկրի տարածքից մյուս երկրի տարածք ռադիոակտիվ աղբյուրների տեղափոխման դեպքում, աջակցություն մասնակից պետություններում ռադիոակտիվ աղբյուրների փոխադրման կարգի խախտման հայտնաբերմանը և կանխարգելմանը, ռադիոակտիվ աղբյուրների դասակարգման ընթացակարգի և հաշվառման համակարգի ներդրում: Փաստաթղթի վավերացումը թույլ կտա ամրապնդել համագործակցությունը Հայաստանի Հանրապետության և ԱՊՀ երկրների իրավասու մարմինների միջև, կնպաստի միջուկային էներգետիկայի ոլորտում անվտանգության մակարդակի բարձրացմանը: Համաձայնագրի իրականացման ժամանակ լիազոր մարմին է հանդիսանալու ՀՀ տարածքային կառավարման և ենթակառուցվածքների նախարարությունը, իսկ ռադիոակտիվ աղբյուրների դասակարգումն իրականացնելու է Միջուկային անվտանգության կոմիտեն:
Նշենք, որ հանձնաժողովը դրական եզրակացություն է տվել ներկայացված փաստաթղթի վերաբերյալ, որն այժմ կքննարկվի ՀՀ Ազգային ժողովի լիագումար նիստում:
