Արմինֆո. TUMO ստեղծարար տեխնոլոգիաների կենտրոնը մեկ հարկի տակ է հավաքել Հայաստանի ԱԲ համայնքը՝ մարդու, ընկերությունների, երկրի զարգացման գործում արհեստական բանականության (ԱԲ) դերը քննարկելու նպատակով: Հանդիպման նախաձեռնողը ReArmenia հիմնադրամն էր։
Այդ նպատակով, բացի ոլորտային բանախոսների ելույթներից, տեղի են ունեցել "Ինչպես քայլել ԱԲ հետ համընթաց" թեմայով պանելային քննարկումներ, որոնց հրավիրյալ բանախոսներից էր Ամերիաբանկի մարդկային ռեսուրսների կառավարման ծառայության ղեկավար Աննա Վարդանյանցը:
Նախքան միջոցառման մեկնարկը լրագրողների հետ զրույցում նա նշել է, որ Ամերիաբանկն ակտիվորեն ներդնում է ԱԲ՝ իր բոլոր աշխատակիցների համար իրականացնելով լայնածավալ ուսուցողական դասընթացներ: «Ամերիան առաջին ընկերություններից մեկն է, որը մեծ ուշադրություն է հատկացրել եւ հատկացնում է ԱԲ-ին և այն ինտեգրել է իր կրթական ծրագրերին: Մեզ համար մեծ նշանակություն ունի, որպեսզի այդ գիտելիքները հասանելի դառնան բոլորին։ Սա կարևոր գործիք է ոչ միայն անձնական աճի, այլև ամբողջ ընկերության համար: Մենք իրականացնում ենք ծրագրեր ինչպես մասնաճյուղային ցանցի ղեկավարների, այնպես էլ շարքային աշխատակիցների, տեխնոլոգիական արտադրանքի թիմերում ներգրավված մասնագետների համար: Չէ որ՝ ԲԱ-ը հնարավորություններ է ստեղծում տեխնիկական աշխատանքի ավտոմատացման համար՝ թույլ տալով մարդկանց ավելի շատ կենտրոնանալ ստեղծարար աշխատանքի, մտածողության, մարդկային հույզերի, հարաբերությունների և ավելի ազատ լինելու ցանկության վրա", - ներկայացրել է ծառայության ղեկավարը:
Ընդ որում, նա նշել է, որ ԱԲ-ի զարգացման հետ մեկտեղ Ամերիաբանկում ակտիվորեն ընթանում է աշխատակիցների վերաորակավորման, նրանց ապագայի հմտություններին նախապատրաստելու գործընթացը:
Վարդանյանցն անդրադարձել է նաև ReArmenia հիմնադրամի հետ համագործակցությանը, նշելով, որ այն շարունակական բնույթ է կրում: Այդ առնչությամբ Մարդկային ռեսուրսների կառավարման ծառայության ղեկավարը պատմել է, որ այժմ քննարկումներ են ընթանում ԱԲ գործակալների ստեղծման նոր նախագծի շուրջ, որոնք կարող են օգնել HR (Human Resources) ոլորտում աշխատանքի օպտիմալացման առումով: «Ընկերությունների արդյունավետությունը որոշվում է ոչ թե աշխատողների քանակով, այլ ճկունության և փոփոխություններին հեշտ հարմարվելու աստիճանով: Կարծում եմ, որ այս առումով մեծ հնարավորություններ կան առանց աշխատակիցների հաստիքների ավելացման բարելավել ֆինանսական ցուցանիշները", - ընդգծել է նա։
Միջոցառման ընթացքում հայտնի է դարձել, որ ReArmenia հիմնադրամն անցյալ տարվա նոյեմբերին ստեղծել է ReArmenia ակադեմիա, որն իրականացնում է արհեստական բանականության ոլորտում հմտությունների բարձրացման կրթական ծրագիր՝ երեք ուղղություններով․ "AI Qez Ban" (21-րդ դարում գոյատևման հմտությունների զարգացման և շարունակական կրթության առաջատար նախաձեռնություն), AI Agentic Education Platform (ԱԲ -գործակալների օգտագործմամբ կրթություն) և ԱԲ միջոցով ընկերությունների փոխակերպման վերաբերյալ խորհրդատվություն և լուծումներ։
Ակադեմիայի տնօրեն Ռեբեկա Հակոբյանի խոսքով՝ կրթական տեխնոլոգիական այս հաստատությունը Հայաստանում ստեղծված միակ ստարտափն է, որի հիմնադիրն է Հիմնադրամը: Այսօրվա դրությամբ Ակադեմիան ներգրավել է 670 հազար դոլար ավելի քան տասը տեղական և միջազգային ներդրողներից ' ընկերության ընդհանուր 10 մլն դոլար գնահատման դեպքում: Հիմնական բաժնետերը շարունակում է մնալ ReArmenia հիմնադրամը: «Մենք կարողացել ենք ներգրավել հետաքրքիր միջազգային ներդրողների, այդ թվում ՝ հայկական ծագում ունեցող, ովքեր հավատում են, որ ժամանակն է ակտիվորեն աշխատել և օգնել աշխարհի հայերին օգտագործել ԱԲ-ը, փոխակերպվել ԱԲ-ի միջոցով և դառնալ ավելի ստեղծարար և արդյունավետ: Եվ ամեն ինչ փորձարկելով և մոդելավորելով Հայաստանում ՝ մենք կկարողանանք դառնալ կրթական տեխնոլոգիաներ արտահանող երկիր, ինչը մենք, գործնականում, արդեն սկսել ենք", - լրագրողների հետ զրույցում ասել է Հակոբյանը։ Այդ առնչությամբ նա տեղեկացրել է, որ արդեն համագործակցության պայմանավորվածություններ են ձեռք բերվել Հնդկաստանի ամենահին համալսարաններից մեկի՝ Bharatiya Vidya Bhavan-ի (BVB) և #ai4abillion հասարակական նախաձեռնության հետ: Գործընկերության շրջանակներում 2026 թվականի փետրվարին Հնդկաստանում առաջին անգամ կգործարկվի ԱԲ և AI4Bharat ծրագիրը հինդի և անգլերեն լեզուներով, որը հիմնված է ReArmenia ակադեմիայի կրթական բովանդակության վրա: "Դա կամրապնդի Հայաստանի դիրքերը՝ որպես արհեստական բանականության, կրթական տեխնոլոգիաների եւ կրթությունը փոխակերպող երկիր", - ընդգծել է Ակադեմիայի ղեկավարը:
ReArmenia հիմնադրամի տնօրեն Գևորգ Պողոսյանն, իր հերթին, հավելել է, որ կրթական ծրագրերի նպատակն է 5 տարվա ընթացքում ԱԲ կրթություն տալ շուրջ 1 մլն հայի: Միայն 2025 թվականին արդեն վերապատրաստվել է 9 հազար մարդ՝ ինչպես առցանց, այնպես էլ օֆլայն ձևաչափերով։ Պողոսյանի ասելով՝ խոսքը ինչպես անհատների, այնպես էլ ընկերությունների մասին է ՝ սկսած խոշոր հարկատուներից, վերջացրած փոքր ձեռնարկություններով։ Բացի այդ, զարգանում է նաև համագործակցությունը կրթական հաստատությունների հետ։ «Գործնականում, արդեն ձևավորվել է միջավայր: Մենք գտնվում ենք լուրջ փոխակերպման փուլում։ Դա այլընտրանք չունեցող ճանապարհ է մեր զարգացման համար», - նշել է նա։
