​​​​​​​Երբ ԿՍՊ-ն դառնում է բիզնեսի զարգացման շարժիչ ուժ․ Լալա Բախշեցյան

Արմինֆո.IDBank-ի սոցիալական պատասխանատվության ծրագրերի ամփոփում

2025 թվականը IDGroup-ը եզրափակում է որպես պատասխանատու բիզնեսի կայացած մշակույթ ձևավորած կազմակերպություն։ Կորպորատիվ սոցիալական պատասխանատվությունը (ԿՍՊ) ընկերության համար վաղուց այլևս կամավոր նախաձեռնություն չէ․ այն ռազմավարական ուղղություն է, որի վրա կառուցվում են երկարաժամկետ նպատակներն ու  գործընկերային հարաբերությունները։

IDGroup-ի բաժնետեր Լալա Բախշեցյանի խոսքով՝ ԿՍՊ-ն այսօր ընկերության ռազմավարության անբաժանելի մասն է, որն ընկալվում է յուրաքանչյուր աշխատակցի կողմից։ 2025 թվականին իրականացված ծրագրերը վկայում են, որ ԿՍՊ-ն ոչ միայն սոցիալական ազդեցություն է ստեղծում, այլև նպաստում է բիզնեսի կայուն զարգացմանը։

ԿՍՊ ռազմավարություն՝ ազդեցության լայն շրջանակով

2025-ին IDGroup-ը իրականացրել է համապարփակ ԿՍՊ ռազմավարություն՝ ուղղված ֆինանսական կրթության և թվային գրագիտության զարգացմանը, մարզերի և ՓՄՁ-ների աջակցությանը, ներառականությանը, սոցիալական խնդիրների լուծմանը, բնապահպանությանը և աշխատակիցների բարեկեցությանը։ Ընտրված ուղղությունները բխում են ընկերության կորպորատիվ արժեքներից և միտված են հասարակության ներկա ու ապագա կարիքների բավարարմանը։

Տարվա ընթացքում իրականացված ծրագրերի ամենամեծ ազդեցությունն ապահովել են «Մի դրամի ուժը», «Կողք կողքի» և «Ֆինանսապես գրագետ Իդրամի և IDBank-ի հետ» նախաձեռնությունները։

«Մի դրամի ուժը»՝ համատեղ ազդեցության օրինակ

2025 թվականին IDBank-ը և Իդրամը «Մի դրամի ուժը» նախաձեռնության շրջանակում ֆինանսավորել են 12 սոցիալական ծրագիր՝ ավելի քան 60 մլն դրամ ընդհանուր ծավալով, իսկ Մի դրամի ուժի՝ 5 տարվա գումարն արդեն գերազանցում է 260 մլն-ը։ 2025-ին իրականացված ծրագրերը ընդգրկել են կրթության, տեղեկատվական տեխնոլոգիաների, ներառական միջավայրի, բնապահպանության, ֆինանսական գրագիտության, ինչպես նաև պատերազմի մասնակիցների և խոցելի խմբերի աջակցության ոլորտները։ Նախորդ տարվա ցուցանիշի համեմատ օգտատերերի վճարումների քանակն աճել է ավելի քան 20%-ով։

Գիտելիքը՝ կայուն ապագայի հիմք

Ֆինանսական կրթությունն ու թվային գրագիտությունը IDGroup-ի ԿՍՊ քաղաքականության առանցքային ուղղություններից են։ «Ֆինանսապես գրագետ Իդրամի և IDBank-ի հետ» արշավը 2025-ին ընդգրկել է շուրջ 1500 մասնակցի՝ 25 սեմինարների և վեբինարների միջոցով։ Միջոցառումներն իրականացվել են ՀՀ բոլոր մարզերում՝ դպրոցների, ճամբարների և կրթական կառույցների հետ համագործակցությամբ։ Արշավը նպաստել է ոչ միայն ֆինանսական հմտությունների զարգացմանը, այլև զեղծարարություններից պաշտպանվելու վերաբերյալ իրազեկվածության բարձրացմանը։ Երեխաների ֆինանսական գրագիտությանը նպաստելու համար Idram Junior հավելվածում ստեղծված Junius ֆինանսական գրագիտության խաղը հատուկ դերակատարություն ունի․ ամեն ամիս երեխաները ստանում են մրցանակներ խաղալու և ֆինանսական ոլորտում գիտելիքներ ձեռք բերելու համար։

Ուժեղ համայնքներ, կայուն տնտեսություն

IDGroup-ը կարևորում է մարզերի համաչափ տնտեսական զարգացումն ու ՓՄՁ-ների հզորացումը։ 2025-ին Իդրամ QR-ով վճարելու հնարավորությունը հատել է 26,000 վաճառակետի սահմանը։ Ուրախալի է, որ նշված թվի  40%-ը գտնվում է մարզերում։ Տարվա ընթացքում IDBank-ն ընդլայնել է մասնաճյուղային ցանցը՝  ներկայություն ապահովելով մի շարք մարզերում, իսկ օնլայն բանկինգի միջոցով ծառայությունները հասանելի են ողջ հանրապետությունում։

Տարվա կարևոր ձեռքբերումներից են Իդրամի ռազմավարական համագործակցությունները Bybit-ի և Alipay-ի հետ, որոնք հնարավորություն են տվել զբոսաշրջիկներին Հայաստանում կատարել QR վճարումներ՝ նպաստելով հատկապես մարզերում առևտրի և հյուրընկալության ոլորտների ակտիվացմանը։

Հավասար հնարավորություններ բոլորի համար

Ներառականությունը IDGroup-ի համար սկզբունքային արժեք է։ 2025-ին իրականացվել են աշխատակիցների վերապատրաստումներ և շուրջ 15 մլն դրամի ներդրումներ ներառական միջավայրի զարգացման ուղղությամբ՝ «ՔայլՏեք», «Հերոսների վերականգնողական քաղաք» և «Հույսի կամուրջ» ՀԿ-ների ծրագրերի միջոցով։ Ծրագրերի ազդեցությունը հասել է 513 շահառուի։

Սոցիալական աջակցություն՝ մարդակենտրոն մոտեցմամբ

IDBank-ի «Կողք կողքի» ծրագրի շրջանակում 2025-ին իրականացվել են Արցախից տեղահանվածների կյանքի որակի բարելավմանն ուղղված 4 միջոցառում։ Ծրագրերը ներառել են մասնագիտական կրթություն արցախցի կանանց համար, ֆինանսական գրագիտության դասընթացներ դպրոցականների համար, մանկապարտեզի ստեղծում Սյունիքի մարզում և կրթաթոշակային աջակցություն արցախցի ուսանողներին։ Ընդհանուր ներդրումները կազմել են տասնյակ միլիոնավոր դրամներ և նպաստել են շահառուների կայունացմանն ու ինքնաբավության բարձրացմանը։

Պատասխանատվություն բնության հանդեպ

Բնապահպանական ուղղությամբ IDGroup-ը 2025-ին ներդրել է ավելի քան 10.4 մլն դրամ։ Նախորդ տարիներին IDGroup ընկերությունների շնորհիվ Հայաստանի անտառային ֆոնդում տնկվել է ավելի քան 30,000 ծառ։ 2025-ին իրականացված «Սիմֆոնիկ անտառ» ծրագրի արդյունքում նախատեսվում է տնկել ևս շուրջ 7,000 ծառ, իսկ Բանկերի միության և ՀՀ բոլոր բանկերի հետ համատեղ իրականացվող միջոցառման շրջանակում ևս 5555 ծառ։ Այս համատեքստում կարևոր է նշել, որ թվային բանկինգի և օնլայն գործարքների զարգացումը զգալիորեն կրճատել է թղթի և պլաստիկի սպառումը։

Աշխատակիցները՝ կազմակերպության առանցքում

IDGroup-ը աշխատակիցներին դիտարկում է որպես հիմնական արժեք։ Ընկերությունում գործում է հավասար հնարավորությունների վրա հիմնված կադրային քաղաքականություն, արտոնությունների լայն փաթեթ և շարունակական զարգացման ծրագրեր։ IDBank-ի IDream կրթական ծրագրի արդյունքում 2025-ին 47 շրջանավարտից 34-ը համալրել են բանկի թիմը։

Նոր նպատակներով՝ դեպի 2026

2026-ին IDGroup-ը շարունակելու է ԿՍՊ քաղաքականության խորացումն ու ազդեցության ընդլայնումը՝ կենտրոնանալով ֆինանսական և թվային գրագիտության, մարզերի զարգացման, ներառականության, «կանաչ» նախաձեռնությունների և աշխատակիցների բարեկեցության վրա՝ նպատակ ունենալով նպաստել ավելի ներառական, կրթված և կայուն հասարակության ձևավորմանը։