Արմինֆո. ITB Berlin 2026 միջազգային ցուցահանդեսի շրջանակում ՀՀ ԷՆ Զբոսաշրջության կոմիտեի նախագահ Լուսինե Գևորգյանը հանդիպել է Ալբանիայի զբոսաշրջության, մշակույթի և սպորտի նախարարության մշակույթի հարցերով փոխնախարար Լիրա Պիպային, Զբոսաշրջության քաղաքականության և զարգացման գլխավոր տնօրեն Սոկոլ Իսմայիլիին և Զբոսաշրջության խթանման տնօրեն Էլկանա Հիմչիին։
ՀՀ Զբոսաշրջության կոմիտեի հաղորդագրության համաձայն, հանդիպման ընթացքում քննարկվել են երկկողմ զբոսաշրջային համագործակցության հեռանկարները, ներկայացվել են զբոսաշրջային վիճակագրության տվյալները և ոլորտի վերջին զարգացումները։
Անդրադարձ է կատարվել զբոսաշրջության ոլորտում թվայնացման և արհեստական բանականության գործիքների կիրառմանը, ինչպես նաև փորձի փոխանակմանը։
Քննարկվել են խոշոր միջազգային միջոցառումների, ցուցահանդեսների, փառատոների և MICE միջոցառումների շրջանակում համագործակցության հնարավորությունները։
Նշվել է, որ երկրների միջև գործում է առանց վիզայի ռեժիմ, սակայն առկա չեն ուղիղ չվերթներ։
Հանդիպման ընթացքում կարևորվել է համագործակցության ընդլայնումը՝ համատեղ ծրագրերի իրականացման, առաջատար միջոցառումներին փոխադարձ մասնակցության և գործարար կապերի զարգացման միջոցով։
ՀՀ վիճակագրական կոմիտեի տվյալների համաձայն, 2025 թվականին Ալբանիայից Հայաստան է այցելել ընդամենը 255 զբոսաշրջիկ, ինչը 4,9 տոկոսով զիջում է 2024 թվականի ցուցանիշին ։
