Արմինֆո. ՀՀ փոխվարչապետ Տիգրան Խաչատրյանի գլխավորությամբ տեղի է ունեցել «Հյուսիս-հարավ» ճանապարհային միջանցքի, Մ-6 Միջպետական ավտոճանապարհի (Վանաձոր-Ալավերդի-Վրաստանի սահման), Կայուն քաղաքային զարգացման ներդրումային և Հյուսիսային միջանցքի արդիականացման ծրագրերի կառավարման խորհրդի հերթական նիստը:
Ինչպես հայտնում է ՀՀ կառավարության մամուլի ծառայությունը, նիստի ընթացքում քննարկվել են 7 կիլոմետր երկարությամբ Քաջարանի թունելի շինարարությանը և թունելի մոտ 4 կիլոմետր երկարությամբ մոտեցնող ճանապարհի վերակառուցմանը վերաբերող հարցեր: Խորհրդին են ներկայացվել և հաստատվել են մրցութային հայտերի գնահատման արդյունքները:
Քննարկվել են նաև Քաջարանի թունելի շինարարական աշխատանքների տեխնիկական հսկողության ծառայությունների ձեռքբերման նպատակով հայտարարված միջազգային մրցույթի տեխնիկական առաջարկների գնահատման արդյունքները: «Ճանապարհային դեպարտամենտ» հիմնադրամին հանձնարարվել է անցնել մրցութային գործընթացի հաջորդ փուլին՝ ապահովելով ֆինանսական առաջարկների բացումը, դրանց գնահատումը և հաղթող ընկերության վերջնական ընտրությունը:
Նիստի վերջում Խաչատրյանը քննարկված հարցերի վերաբերյալ մի շարք դիտողություններ է արել և համապատասխան հանձնարարականներ տվել:
Հիշեցնենք, որ «Հյուսիս-հարավ» ավտոճանապարհի Քաջարան-Ագարակ հատվածը կառուցվում է ՀՀ կառավարության և Կայունացման և զարգացման եվրասիական հիմնադրամի ֆինանսավորմամբ:
Շինարարությունն իրականացնում է իրանական կոնսորցիումը, մասնավորապես՝ «Abad Rahan Pars International Group» և «Tunnel Sadd Ariana» ընկերությունները: Նախագիծը «Հյուսիս-հարավ» միջանցքի առանցքային մասն է՝ ապահովելով շինարարության բարձր տեմպեր:
Մարտի վերջին ՀՀ Ազգային ժողովում կառավարության հետ հարցուպատասխանի ժամանակ ՀՀ տարածքային կառավարման և ենթակառուցվածքների նախարար Դավիթ Խուդաթյանը հայտնել էր, որ աշխատանքների 45%-ն արդեն կատարված է: Մասնավորապես, ավարտվել են երկու թունելների հորատման աշխատանքները, իսկ 15 կամուրջներից 14-ում իրականացվում են ակտիվ աշխատանքներ:
Նախատեսվում է, որ ճանապարհի այս հատվածը շահագործման կհանձնվի 2027 թվականի վերջին կամ 2028 թվականի սկզբին՝ կախված եղանակային պայմաններից:
