Արմինֆո. ՀՀ վարչապետ Նիկոլ Փաշինյանը նախօրեին մասնակցել է «Հյուսիս-Հարավ» նախագծի Աշտարակից Գյումրի տանող հյուսիսային հատվածի բացմանը։ Այս մասին հայտնել է ՀՀ կառավարության մամուլի ծառայությունը։
Պատասխանատու անձինք տեղեկացրել են, որ Աշտարակ-Գյումրի ճանապարհահատվածի ընդհանուր երկարությունը կազմում է շուրջ 84 կմ։ Շինարարությունն իրականացվել է 4 փուլով. Ագարակ հնագիտական հուշարձանը շրջանցող մոտ 8 կմ երկարությամբ հատվածի, 34 կմ երկարությամբ Աշտարակ-Թալին հատվածի, 18,7 կմ երկարությամբ Թալին-Լանջիկ հատվածի և 23 կմ երկարությամբ Լանջիկ-Գյումրի հատվածի աշխատանքները կատարվել են Կառավարության, Ասիական զարգացման բանկի և Եվրոպական ներդրումային բանկի ֆինանսական աջակցությամբ։
Այսպիսով, Աշտարակ-Գյումրի հատվածում կառուցվել է առաջնակարգ տեխնիկական ճանապարհ՝ 90 կմ/ժ առավելագույն թույլատրելի արագությամբ։ Յուրաքանչյուր ուղղությամբ առկա է 3,6 մ լայնությամբ երկու երթևեկելի գոտի։ Ճանապարհն ունի նաև 2 մետր լայնությամբ տեխնիկական և պաշտպանիչ գոտի, որը նախատեսված է տրանսպորտային միջոցների խափանման դեպքում կայանման, ճանապարհային վերանորոգման աշխատանքների կազմակերպման և այլ նպատակների համար։ Բնակավայրերի մուտքերը նոր ճանապարհից կազմակերպված են տրանսպորտային հանգույցների միջոցով։ Աշտարակից մինչև Գյումրի ընդհանուր առմամբ կառուցվել է 19 տրանսպորտային հանգույց և 10 կամրջային անցում։
Կառուցվել է 17 անցում գյուղատնտեսական տեխնիկայի համար, ինչպես նաև անասնանցումներ։ Կառուցվել են նաև ճանապարհներ, որոնք ապահովում են մուտքը դեպի քաղաքացիների հողամասեր և տներ։ Տրանսպորտային հանգույցներում նախատեսված է լուսավորության համակարգ։ Ճանապարհահատվածի շինարարությունը զգալիորեն կբարձրացնի ճանապարհային երթևեկության անվտանգությունը։
Հիշեցնենք, որ «Հյուսիս-Հարավ» նախագիծը թույլ կտա կրճատել իրանական սահմանից մինչև վրացական սահման հեռավորությունը՝ 556-ից դարձնելով 490 կիլոմետր։ Նախագիծը կապահովի ելք դեպի Սև ծով և դեպի եվրոպական երկրներ Հայաստանի տարածքով (Մեղրի - Կապան - Գորիս - Երևան - Աշտարակ – Գյումրի - Բավրա) դեպի Վրաստան։ Միջանցքի շինարարությունն ի սկզբանե նախատեսվում էր ավարտել դեռևս 2019 թվականին։
