Արմինֆո. Հայաստանի Կենտրոնական բանկի նախագահ Մարտին Գալստյանը չի կասկածում, որ ՀՆԱ-ում փոքր և միջին բիզնեսի (ՓՄՁ) բաժնեմասը կհաջողվի հասցնել 40%-ի։ Այս մասին նա հայտարարել է լրագրողներին «ՓՄՁ ոլորտ. զարգացման ազդեցությունն ու մարտահրավերները» ֆորումի շրջանակներում՝ մեկնաբանելով վարչապետ Նիկոլ Փաշինյանի խոսքերը ՀՆԱ-ում ՓՄՁ բաժնեմասի թիրախային աճը մինչև 40% հասցնելու վերաբերյալ։
«Ես այդ հարցում կասկածներ չունեմ, որովհետև մենք ունենք տաղանդավոր բիզնես համայնք, ինչպես նաև բանկեր, որոնք, հարաբերություններ կառուցելով ձեռնարկատիրական համայնքի հետ, վարկավորման հնարավորություններ են ստանում, ինչն էլ նպաստում է մեր նպատակին առաջ շարժվելուն»,- նշել է նա՝ հավելելով, որ ֆորումի անցկացումն ու բանկերի ու փոքր և միջին բիզնեսի միջև երկխոսության զարգացումը թույլ կտան հասնել սահմանված նպատակներին։
ԿԲ ղեկավարը կարծիք է հայտնել, որ ՓՄՁ ձեռնարկությունները աստիճանաբար դառնում են ավելի որակյալ և թափանցիկ։ Նա ընդգծել է, որ երկրում գործում են պետական աջակցության ծրագրեր, որոնց շրջանակներում ընկերությունները թափանցիկության բարձրացման խթաններ են ստանում՝ աուդիտի, վարկանիշների և այլ գործիքների միջոցով։ «Կարծում եմ, որ ժամանակի ընթացքում մենք կունենանք և՛ ավելի որակյալ ընկերություններ, և՛ ավելի որակյալ բանկային պրոդուկտներ»,- ասել է Գալստյանը։
Նշենք, որ Հայաստանում գործող շուրջ 115 հազար միկրո, փոքր և միջին ձեռնարկություններից (ՄՓՄՁ) վարկեր ունեն միայն մոտ 16 հազարը։ Ընդ որում, ոլորտն ապահովում է հարկային մուտքերի մեկ երրորդից մի փոքր ավելին։
Հայաստանի ՀՆԱ-ում ՓՄՁ բաժնեմասը կազմում է մոտ 35%, այնինչ ԵՄ երկրներում այս ցուցանիշը հասնում է 50-60%-ի, իսկ հարևան Վրաստանում՝ 45-50%-ի։
