Արմինֆո. Առաջիկա տարիներին Հայաստանի կառավարությունը լուրջ աշխատանք ունի անելու մրցակցության ուղղությամբ։ Նման կարծիք «ՓՄՁ ոլորտ. զարգացման ազդեցությունն ու մարտահրավերները» ֆորումի շրջանակներում անցկացված պանելային քննարկման ժամանակ հայտնել է ՀՀ ֆինանսների նախարար Վահե Հովհաննիսյանը։
«Կառավարությունը փորձում է անել հնարավոր ամեն ինչ՝ աջակցելու այն ձեռնարկատերերին, ովքեր ցանկանում են ներդրումներ կատարել, ստեղծել նոր հավելյալ արժեք և բարձրացնել արտադրողականությունը։ Բայց, իմ կարծիքով, կա մի հարց, որի ուղղությամբ մենք դեռ պետք է լուրջ աշխատենք առաջիկա տարիներին. դա մրցակցությունն է»,- ընդգծել է ֆինանսների նախարարության ղեկավարը։ Նա նկատել է, որ փոքր և միջին բիզնեսի համար առողջ մրցակցային միջավայրի առկայությունը չափազանց կարևոր է։ Հղում անելով իրականացված հետազոտությունների արդյունքներին՝ Հովհաննիսյանը նշել է, որ Հայաստանում ռեսուրսները միշտ չէ, որ ուղղվում են այն ոլորտներին, որտեղ ապահովվում է բարձր արտադրողականություն և նորարարություն։ «Այլ կերպ ասած՝ եթե մենք իսկապես ցանկանում ենք աջակցել նորարարական փոքր և միջին ձեռնարկություններին, որոնք ջանքեր են ներդնում որակյալ ապրանքների և ծառայությունների ստեղծման գործում, ապա մեր առանցքային խնդիրը, բացի արդեն իսկ ձեռնարկվող միջոցներից, պետք է դառնա լիարժեք մրցակցային միջավայրի ապահովումը»,- ասել է նախարարը։ Նա նկատել է, որ դա կվերաբերի նաև բանկային համակարգին, քանի որ հենց մրցակցությունն է երաշխավորում, որ շուկայում ձևավորվող տոկոսադրույքներն արդարացի են և իսկապես արտացոլում են շուկայական պայմանները։
Նշենք, որ 2025 թվականի արդյունքներով Հայաստանի ՀՆԱ-ում ՓՄՁ բաժնեմասը կազմել է 35%։ Երկրում գործում է փոքր և միջին բիզնեսի 115 հազար սուբյեկտ։ Ոլորտը հիմնականում ներկայացված է ծառայությունների և առևտրի բնագավառներով։
