Արմինֆո.Հայաստանի իշխանությունները մտադիր են սեփական ուժերով վերականգնել դեպի Թուրքիա երկաթուղային հաղորդակցությունը և սկսել Երասխի երկաթուղային հանգույցի վերանորոգումը։ Այս մասին նախընտրական քարոզարշավի ընթացքում հայտարարել է ՀՀ վարչապետ Նիկոլ Փաշինյանը։
Նրա խոսքով՝ արդեն ամենամոտ ժամանակներս կսկսվի Գյումրի-Ախուրիկ - Աքյաքա երկաթգծի հատվածի վերականգնումը՝ թուրքական Կարս նահանգի ուղղությամբ։ Փաշինյանը նկատել է, որ Թուրքիայի կողմից աշխատանքներն արդեն սկսվել են։ Գյումրի - Ախուրիկ ճանապարհի արդիականացմամբ երկաթուղին կբացվի։
Ինչ վերաբերում է Երասխի երկաթուղային հանգույցի վերանորոգմանը, ապա, ինչպես նշել է վարչապետը, չնայած Ռուսաստանի Դաշնության հետ կոնցեսիոն պայմանագրի առկայությանը, երկրի իշխանությունները նույնպես պատրաստվում են նախագիծն իրականացնել սեփական ուժերով։ «Մենք ուզում ենք ներդրումներ անել, վերանորոգել երկաթուղին, վերականգնել այն և շահագործման հանձնել»,- նշել է Փաշինյանը։
Նա հավելել է, որ առաջիկա տարիներին Հայաստանին մեծ իրադարձություններ են սպասվում՝ կապված TRIPP նախագծի իրականացման հետ։ Ներկայումս նախապատրաստական աշխատանքներ են տարվում ԱՄՆ-ի հետ համաձայնագրի ստորագրման ուղղությամբ՝ հրապարակված պայմանավորվածությունների շրջանակներում։ Վարչապետը նշել է, որ երբ նախագիծն իրականացվի, կհայտնվի Մեղրիով անցնող երկաթուղի, որը կմտնի Նախիջևան, այնտեղից՝ Երասխ, Երասխից՝ Գյումրի, Գյումրիից՝ Ախուրիկ, իսկ այնտեղից արդեն՝ Թուրքիա։ Նաև նախագծի իրականացումը թույլ կտա երկաթուղի բացել դեպի Իրան։ «Այդպիսով՝ Պարսից ծոցից մենք կունենանք երկաթուղային հաղորդակցություն ընդհուպ մինչև Սև ծով՝ Բաթումիի, Փոթիի, ինչպես նաև Անակլիայի նավահանգիստներ։ Սա զգալիորեն կփոխի տնտեսական իրավիճակը Հայաստանում»,- հայտարարել է Փաշինյանը։
Հիշեցնենք, որ TRIPP (Trump Route for International Peace and Prosperity - Թրամփի երթուղի հանուն միջազգային խաղաղության և բարօրության) ծրագիրը աշխարհաքաղաքական նախաձեռնություն է՝ ուղղված Հայաստանի Սյունիքի մարզով տրանսպորտային միջանցքի ստեղծմանը։ Նախագիծն ուղղված է տարածաշրջանային կոմունիկացիաների ապաշրջափակմանը, Ադրբեջանի հիմնական տարածքը Նախիջևանի հետ կապելուն և միջազգային առևտրային ցանցերին ինտեգրմանը։
