Արմինֆո. Կան գործոններ, որոնք որոշակի լարվածություն, նյարդ են առաջացնում հայ-ռուսական հարաբերություններում։ Այս մասին մայիսի 28-ին կայացած ճեպազրույցի ժամանակ լրագրողներին հայտարարել է Հայաստանի վարչապետ Նիկոլ Փաշինյանը՝ նշելով, որ խոսքը երկաթուղու մասին է։
«Մենք պետք է օգտագործենք այս պատմական շանսը և չենք պատրաստվում հրաժարվել այս օրակարգից։ Որովհետև չենք կարող թույլ տալ, որ մեր երկաթուղին գտնվի մետաղաջարդոնի կարգավիճակում»,- ասել է վարչապետը։
Փաշինյանի խոսքով՝ Հայաստանի երկաթուղին մեծ տարանցիկ ներուժ ունի։ Հետևաբար, աշխատանքը ռուս գործընկերների հետ կշարունակվի՝ փոխշահավետ լուծումներ գտնելու նպատակով։
Նշենք, որ փետրվարի 13-ին Հայաստանի վարչապետ Նիկոլ Փաշինյանը լրագրողների հետ զրույցում հայտարարել էր, որ ռուսական կողմից Հայաստանի երկաթուղիների կոնցեսիոն կառավարման փաստը մրցակցային խնդիրներ է ստեղծում Հայաստանի համար, և շատ միջազգային գործընկերներ ցանկանում են շրջանցել հայկական տարածքը ենթակառուցվածքային նախագծերի իրականացման ժամանակ։ Այս համատեքստում նա ՌԴ-ին առաջարկել էր մտածել կոնցեսիան երրորդ՝ բարեկամ երկրի վաճառելու շուրջ։ Որպես օրինակ նա առաջարկել էր Ղազախստանը, ԱՄԷ-ն կամ Կատարը։
Հիշեցնենք, որ «ՀԿԵ» ՓԲԸ-ն հանդիսանում է «Ռուսական երկաթուղիներ» ԲԲԸ-ի 100% դուստր ձեռնարկությունը: 2008 թվականի փետրվարի 13-ին Երևանում «Ռուսական երկաթուղիներ» ԲԲԸ-ի և Հայաստանի Հանրապետության միջև ստորագրվել է կոնցեսիոն պայմանագիր՝ հանրապետության երկաթուղային տրանսպորտի համակարգը «ՀԿԵ» ՓԲԸ-ի կառավարմանը հանձնելու մասին: Պայմանագրի համաձայն՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ առաջին քսան տարվա աշխատանքից հետո այն ևս 10 տարով երկարաձգելու իրավունքով։ «ՀԿԵ» ՓԲԸ-ի խնդիրների մեջ են մտնում ՀՀ երկաթուղային ենթակառուցվածքի արդիականացումը, Հայաստանի սահմանակից պետությունների հետ համագործակցության զարգացումը, ներհանրապետական և միջազգային ուղևորափոխադրումների ու բեռնափոխադրումների զարգացումը։ Ընկերության կողմից իրականացվող ներդրումների չափը կազմում է 572 միլիոն դոլար։ Իր գործունեությունը «ՀԿԵ» ՓԲԸ-ն սկսել է 2008 թվականի հունիսի 1-ից։
