Արմինֆո. Նախօրեին գերմանական Շտուտգարտ քաղաքում Հայաստանի բանկերի միության (ՀԲՄ) և գերմանական Landesbank Baden-Wurttemberg (LBBW) բանկի նախաձեռնությամբ տեղի է ունեցել մի շարք Հայաստանի բանկերի ղեկավարների, ՀՀ ԿԲ ներկայացուցիչների հանդիպումը LBBW-ի ղեկավարության հետ։ Այս մասին հայտնում է ՀԲՄ մամուլի ծառայությունը։
Միջոցառման նպատակն էր խորացնել ու ամրապնդել գործարար կապերը Հայաստանի բանկերի և գերմանական Landesbank-ի միջև, ստեղծել նոր հնարավորություններ երկկողմ համագործակցության, փորձի փոխանակման և մասնագիտական կապերի զարգացման համար։
Հանդիպումն ուղղված էր նաև գերմանական առաջատար ֆինանսական կազմակերպությունների հետ ինստիտուցիոնալ համագործակցության խորացմանը՝ Հայաստանի միջազգային ֆինանսական ինտեգրման համատեքստում։
Շտուտգարտում կայացած հանդիպման ընթացքում ողջույնի խոսքով հանդես է եկել Հայաստանի բանկերի միության նախագահ Դանիել Ազատյանը, ով իր ելույթում ընդգծել է առաջատար գերմանական ֆինանսական կազմակերպությունների հետ ինստիտուցիոնալ համագործակցության խորացման կարևորությունը՝ Հայաստանի միջազգային ֆինանսական ինտեգրման համատեքստում։
Միջոցառման ընթացքում հայկական կողմը ներկայացրել է «Հայաստանի մակրոտնտեսական միջավայրը» խորագրով զեկույցը, որում դիտարկվել են Հայաստանի տնտեսական զարգացումը, բանկային համակարգի ընթացիկ վիճակը, կայունության գործոնները և հետագա զարգացման հեռանկարները։
Ելույթ են ունեցել նաև LBBW-ի ներկայացուցիչները՝ ներկայացնելով եվրոպական բանկային համակարգի տեսլականը վճարային համակարգերի, առևտրի ֆինանսավորման, ակտիվների կառավարման, ինչպես նաև տարածաշրջանում տնտեսական հեռանկարների վերաբերյալ։ Լուսաբանվել են նաև միջոցառման շրջանակներում Հայաստանի բանկերի և LBBW-ի համապատասխան ստորաբաժանումների միջև անցկացված երկկողմ հանդիպումներն ու քննարկումները։ Քննարկումների ընթացքում կողմերը հնարավորություն են ունեցել քննարկել փոխադարձ հետաքրքրություն ներկայացնող հարցեր և խորացնել գործընկերային կապերը։
