Արմինֆո. Եվրասիական զարգացման բանկը (ԵԱԶԲ) կփորձի ձևավորել Հայաստանի համար ճիշտ և լավ երկրային ռազմավարություն 2027-2031 թվականների համար։ Այս մասին հունիսի 25-ին Ալմաթիում լրագրողների հետ զրույցում՝ Եվրասիական զարգացման բանկի 20-ամյակին նվիրված տարեկան համաժողովի և բիզնես ֆորումի շրջանակներում, հայտարարել է ԵԱԶԲ վարչության նախագահ Նիկոլայ Պոդգուզովը։
Անդրադառնալով Հայաստանի համար Բանկի նոր նախագծերին և ֆինանսավորման ծավալներին՝ Պոդգուզովը նշել է, որ ներդրումների ստույգ ծավալները դեռևս ճշտվում են։ Նա հիշեցրել է, որ նախորդ ռազմավարական ժամանակահատվածում դրանք կազմել են 380 միլիոն դոլար՝ նկատելով, որ այդ գումարը գերազանցել է սկզբնական կողմնորոշիչը։ «Հայաստանում առանցքային նախագծերի թվում են և՛ «Հայաստանի էլեկտրական ցանցեր»-ը, և՛ Զանգեզուրի պղնձամոլիբդենային կոմբինատը, և՛ «Երեմյան Ֆարմ» խմբի մի շարք նախագծեր (օրինակ՝ արևային էլեկտրակայանը)։ Կարծում եմ, որ կավելանա նաև լոգիստիկայի գծով նախագիծ։ Այսօր, որքան գիտեմ, մենք ստորագրում ենք մեկ նախագիծ՝ «Մայլեռ» տուրիստական համալիրի զարգացման վերաբերյալ։ Ընդհանուր առմամբ, հաշվի առնելով այն, ինչ այսօր ֆորումում հայտնեց նաև Հայաստանի ֆինանսների նախարարը, մենք կփորձենք ձևավորել Հայաստանի համար ճիշտ և լավ երկրային ռազմավարություն»,- նշել է Պոդգուզովը։
Խոսելով ընդհանուր առմամբ Բանկի նախագծերի մասին՝ նա հիշեցրել է, որ ԵԱԶԲ-ն 2022-2026 թվականների ռազմավարական ժամանակահատվածի համար պարտավորություն է ստանձնել 10,9 միլիարդ դոլար ներդնել անդամ երկրների տարածքում գտնվող նախագծերում։
«Այժմ մենք առաջ ենք անցնում այդ թվից. 10,9 միլիարդ դոլարի նշաձողն արդեն հաղթահարված է, և կարծում եմ, որ տարվա արդյունքներով մենք կհասնենք 12 միլիարդ դոլարի։ Հաջորդ ժամանակահատվածի՝ 2027-2031 թվականների համար մենք նախատեսել ենք ներդրումների ծավալ՝ 13,5 միլիարդ դոլարի չափով։ Սա 10-15%-ով, իսկ պոտենցիալ առումով՝ մինչև 20%-ով բարձր է նախորդ ռազմավարության մեջ եղած պարամետրերից։ Եվ մենք վստահ ենք, որ այս բազային սցենարը կկատարենք։ Բայց մենք, անշուշտ, ձգտում ենք ներդրումների ավելի բարձր նշաձողի, սակայն դա կախված կլինի նաև բանկի կապիտալի բազայի աճից։ Ուստի, որպես բազային սցենար, մենք վերցնում ենք այս կողմնորոշիչները, իսկ հետո կնայենք՝ կախված բանկի կապիտալի աճից։ Ինչ վերաբերում է այդ ներդրումների բաշխմանն ըստ երկրների, դրանք կորոշվեն երկրային ռազմավարությունների լրամշակման ընթացքում, որոնք մենք, վստահ եմ, կընդունենք ինչ-որ տեղ հոկտեմբեր-նոյեմբերին»,- ընդգծել է ԵԱԶԲ վարչության ներկայացուցիչը։ Խոսելով ներդրումների առաջնահերթությունների մասին՝ Պոդգուզովը նշել է, որ դրանք են՝ Եվրասիայի տրանսպորտային-լոգիստիկ համալիրը, պարենային անվտանգությունը և պարենային լոգիստիկան, բարձր սահմանային արժեքների արդյունաբերությունը (նոր ռազմավարության մեջ մենք հատուկ ֆոկուս ենք դնում բարձր հավելյալ արժեք ունեցող արդյունաբերության վրա), դե և, իհարկե, Կենտրոնական Ասիայի ջրային-էներգետիկ համալիրը կպահպանի իր կենտրոնական տեղը ԵԱԶԲ աշխատանքում
