Արմինֆո."Շիրակ Ավիա" ավիաընկերությունը գործարկում է միանգամից մի քանի էկզոտիկ ուղղություններ, որոնք Հայաստանի մայրաքաղաքը կկապեն Բալիի, Մալդիվների և Թաիլանդի հետ:
Մասնավորապես, դեպի Մալե (Մալդիվներ) առաջին չվերթը նախատեսվում է նոյեմբերի 14-ին։ Թռիչքները կիրականացվեն շաբաթական մեկ անգամ ՝ շաբաթ օրերին։
Դենպասարի (Բալի) ուղղությամբ մեկնարկը նախատեսված է նոյեմբերի 1-ին՝ կիրակի օրերին:
Իսկ առաջին չվերթը դեպի Փհուքետ (Թաիլանդ) տեղի կունենա նոյեմբերի 5-ին: Թռիչքները նախատեսված են շաբաթական մեկ անգամ ՝ հինգշաբթի օրերին։
Հիշեցնենք ,որ "Շիրակ Ավիա" ՍՊԸ-ն Հայաստանի Հանրապետությունում ստեղծվել է 2019 թվականին: 2021 թվականի հունվարին Քաղաքացիական ավիացիայի կոմիտեն ընկերությանը տվել է շահագործողի վկայական (Air Operator Certificate, AOC) թիվ AM AOC 072, որը նրան շնորհել է ավիաընկերության կարգավիճակ և քաղաքացիական օդանավերի շահագործման իրավունք։
2021 թվականի հոկտեմբերին Քաղաքացիական ավիացիայի կոմիտեն ավիաընկերությանը տրամադրել է նաև կանոնավոր առևտրային ավիափոխադրումների իրականացման սերտիֆիկատ (Regular Commercial Air Services Certificate) № 04, որը թույլ է տալիս կանոնավոր չվերթներ իրականացնել հետևյալ ուղղություններով․ "Զվարթնոց" օդանավակայանից՝ դեպի Մոսկվա, Սարատով, Պերմ, Ուֆա , Կրասնոյարսկ, Կալինիգրադ, Աստանա, Տաշքենդ և Նիժնի Նովգորոդ; "Շիրակ" օդանավակայանից՝ դեպի Մոսկվա, Կրասնոդար, Դոնի Ռոստով, Սոչի Սամարա, Սանկտ Պետերբուրգ։
4 տարվա ընթացքում ընկերությունը տեղափոխել է ավելի քան 700 հազար ուղևորի՝ իրականացնելով 3 հազար անվտանգ չվերթ , ինչպես նաև՝ 2 հազար տոննա բեռ: "Շիրակ Ավիա"-ի ավիապարկը բաղկացած է 4 ինքնաթիռից։
