ԱրմԻնֆո. Դավիթ Թավադյանի մասնագիտական փորձն ու գիտելիքները կնպաստեն առաջադրված խնդիրների արդյունավետ լուծմանը։ Այս մասին հայտարարել է ՀՀ տարածքային կառավարման և ենթակառուցվածքների նախարար Դավիթ Խուդաթյանը՝ Հայաստանի տարածքային կառավարման և ենթակառուցվածքների նախարարության Պետական գույքի կառավարման կոմիտեի աշխատակազմին կառույցի նորանշանակ նախագահ Դավիթ Թավադյանին ներկայացնելու ժամանակ։
Ինչպես հայտնել են հանրապետության տարածքային կառավարման և ենթակառուցվածքների նախարարության մամուլի ծառայությունից, հանդիպման ընթացքում Խուդաթյանը շնորհավորել է Թավադյանին նշանակման կապակցությամբ և մաղթել արդյունավետ աշխատանք՝ ընդգծելով պետական գույքի արդյունավետ և պատասխանատու կառավարման կարևորությունը։ Նրա խոսքով՝ Պետական գույքի կառավարման կոմիտեի առջև դրված խնդիրների պատշաճ կատարումը պահանջում է հետևողական աշխատանք, կառավարման ժամանակակից մոտեցումների կիրառում և պետական ակտիվների առավել արդյունավետ օգտագործման ուղղությամբ շարունակական քայլերի իրականացում։
Իր հերթին Թավադյանը շնորհակալություն է հայտնել նշանակման համար՝ նշելով, որ թեև պետական համակարգում աշխատելու փորձ չունի, սակայն հստակ պատկերացնում է կոմիտեի առջև ծառացած խնդիրներն ու աշխատանքի բնույթը։ Վերջինս նշել է պետական գույքի եկամտաբերության բարձրացման և առկա խնդիրների լուծմանն ուղղված գործուն մեխանիզմների ներդրման ուղղությամբ հետևողական աշխատանքի անհրաժեշտության մասին։
Նախարարը նաև շնորհակալություն է հայտնել Առնակ Ավետիսյանին վերջին տարիներին Պետական գույքի կառավարման կոմիտեն ղեկավարելու, ինչպես նաև Գևորգ Բաբայանին՝ վերջին կես տարվա ընթացքում կոմիտեի նախագահի պարտականությունները կատարելու և աշխատանքը պատշաճ կազմակերպելու համար։
