Արմինֆո. Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել են Երևանի խոշոր քաղաքային ծրագրերի ընթացքին վերաբերող հարցեր։ Այդ մասին հաղորդել է կառավարության մամուլի ծառայությունը։
Հաղորդագրության համաձայն, մասնավորապես, անդրադարձ է կատարվել Հին Երևան և Ֆիրդուսի 33–րդ թաղամասի քաղաքաշինական ծրագրերի ուղղությամբ իրականացված աշխատանքներին և առկա իրավիճակին։ Մանրամասներ են ներկայացվել կառուցապատման, օտարման գործընթացների, չիրացված գույքերի հետ կապված խնդիրների վերաբերյալ։
Այս համատեքստում, քննարկվել են ծրագրերն ավարտին հասցնելուն ուղղված հնարավոր քայլերն ու գործողությունները։
Վարչապետն ընդգծել է երկու խոշոր քաղաքաշինական ծրագրերն ավարտին հասցնելու կարևորությունը և պատասխանատուներին հանձնարարել շարունակել աշխատանքները՝ այսօրվա քննարկման արդյունքներով ընդունված որոշումների հիման վրա։
"Հին Երևան" նախագիծը 19-րդ դարավերջի և 20-րդ դարասկզբի Հայաստանի մայրաքաղաքի պատմամշակութային նկարագիրը առանձին թաղամասի տեսքով վերստեղծելու քաղաքաշինական նախաձեռնություն է: Այն պետք է տեղակայվի քաղաքի կենտրոնում ՝ Աբովյան, Արամի, Բուզանդ և Կողբացի փողոցներով սահմանափակված տարածքում։ Խոսքը արխիվային նյութերով իրական պատմական շենքերի և ճարտարապետական բեկորների տեղափոխման և վերականգնման մասին է։ Նախագիծը ներառում է բազմամակարդակ տարածքներ (վերգետնյա և ստորգետնյա հարկեր), բնակարաններ, ինչպես նաև առևտրի, ռեստորանների և մշակութային միջոցառումների գոտիներ: Նախագծի նպատակն է պահպանել հին քաղաքի ոգին և միավորել պատմական հուշարձանները ժամանակակից քաղաքային միջավայրի հետ:
