ԱրմԻնֆո. Սեպտեմբերի 9-ին Երևանում բացվեց ատոմային ոլորտում կրիտիկական գիտելիքների պահպանմանն ու փոխանցմանը նվիրված սեմինար։ Միջոցառումը կազմակերպել է Ատոմային էներգետիկայի և արդյունաբերության վետերանների միջազգային միությունը (ՄՄԱԷԱԱ)՝ «Ռոսատոմի» աջակցությամբ։
Իր ելույթում ՀԱԷԿ-ի գլխավոր տնօրեն Էդուարդ Մարտիրոսյանը նշեց, որ Հայկական ԱԷԿ-ում առանձին աշխատանքներ իրականացվում են՝ 2041 թվականը հաշվի առնելով։ Նրա խոսքով՝ ներկայում ուսումնասիրվում են կայանի շահագործման ժամկետը մինչև 2036 թվականը, իսկ հնարավորության դեպքում՝ նաև ավելի երկար, երկարաձգելու հնարավորությունները։ Այնուամենայնիվ, ՀԱԷԿ-ի գործող լիցենզիան նախատեսված է մինչև 2031 թվականը։ Մարտիրոսյանը հիշեցրեց, որ Հայկական ԱԷԿ-ի էներգաբլոկն արտադրում է ամբողջ Հայաստանի էլեկտրաէներգիայի 30-40%-ը։ «Սա մեզ համար նշանակալի է ոչ միայն էներգետիկ անվտանգության տեսանկյունից, այլև սոցիալական առումով, քանի որ վերջնական սպառողի համար այն արտադրում է էժան էլեկտրաէներգիա»,- նշեց նա։
Ելույթ ունենալով սեմինարում՝ ՄՄԱԷԱԱ-ի փոխնախագահ Վիտալի Լեբեդենկոն նշեց, որ կազմակերպության հիմնական խնդիրն ատոմային էներգետիկայի և միջուկային տեխնոլոգիաների անվտանգ զարգացմանը նպաստելն է այն հանրապետություններում, որոնք միացել են միությանը։ Ներկայում դրան արդեն միացել են արտասահմանյան վետերանական 20 կազմակերպություններ, վերջին տարիներին միացել են Կենտրոնական Ասիայի բոլոր հանրապետությունները, ինչպես նաև Մոնղոլիան և Թուրքիան։ Լեբեդենկոյի խոսքով՝ Հայաստանի համար խնդրի մասնակի լուծման գործիքներից մեկը մենթորությունն է՝ հատկապես հաշվի առնելով ատոմային էներգետիկայի դերը երկրի էներգետիկ հաշվեկշռում, գործող ԱԷԿ-ի շահագործման ժամկետը երկարաձգելու խնդիրները և ոլորտի հետագա զարգացման համար կադրերի ժամանակին պատրաստման անհրաժեշտությունը։
