ԱրմԻնֆո. Հայաստանի Ազգային ժողովը սեպտեմբերի 14-ի լիագումար նիստում վավերացրել է մի կողմից՝ ԵԱՏՄ անդամ պետությունների, մյուս կողմից ՝ Ինդոնեզիայի Հանրապետության միջև ազատ առևտրի շուրջ համաձայնագիրը:
Իր ելույթում ՀՀ էկոնոմիկայի փոխնախարար Տիգրան Գասպարյանը նշել է, որ համաձայնագիրը ստորագրվել է նախորդ տարվա դեկտեմբերի 21-ին Սանկտ Պետերբուրգում ՝ Եվրասիական տնտեսական բարձրագույն խորհրդի նիստի շրջանակներում: Փաստաթղթի հիմնական նպատակը Ինդոնեզիայի հետ ԵԱՏՄ երկրների առևտրի ակտիվացումն է, առևտրում խոչընդոտների բացառումը և գործարարների համար բարենպաստ պայմանների ստեղծումը: Ձևավորվող նոր առևտրային ռեժիմի շրջանակներում ինդոնեզական կողմը արտոնյալ հասանելիություն է բացել ապրանքային անվանացանկի 90 տոկոսի նկատմամբ։ Միության զիջումները ծածկում են ապրանքային անվանացանկի 90,5% - ը։ Այսպես, Հայաստանից Ինդոնեզիա հանքային ջուր արտահանելու դեպքում 5% մաքսային դրույքաչափը կիջեցվի մինչեւ 0%, մրգերի եւ բանջարեղենի արտաահանման դեպքում՝ 20%-ից մինչեւ 0%, մետալուրգիական ճյուղի մի շարք ապրանքների արտաահանման դեպքում ՝ 5% - ից մինչեւ 0%, դեղամիջոցների արտաահանման դեպքում ՝ 5% - ից մինչեւ 0%, ոսկյա զարդերի արտաահանման դեպքում՝ 15% - ից մինչեւ 0% եւ այլն։
Նշենք, որ առևտրային ռեժիմի ազատականացման արդյունքում ԵԱՏՄ ապրանքների նկատմամբ Ինդոնեզիայի կիրառած միջին տոկոսադրույքը կնվազի հինգ անգամ ՝ 10,2% - ից մինչեւ 2%: Ապրանքային կտրվածքով արտոնյալ հասանելիություն կապահովվի ԵԱՏՄ այնպիսի առանցքային գյուղատնտեսական ապրանքների համար, ինչպիսիք են հացահատիկային մշակաբույսերը (ցորեն, կորեկ, աշորա, վարսակ), համեմունքները, ալյուրի առանձին տեսակները, հացաբուլկեղենը, ձուկը և միսը, կաթնամթերքը, ներառյալ կաթի փոշին և պանիրը, հանքային ջրերը և այլն:
