Արմինֆո. Հայաստանի հանրային միջավայրում առկա է երկրի բարձրաստիճան պաշտոնյաների աշխատավարձերի առաջիկա բարձրացման թյուր ընկալում. հավելավճարներ կստանան ոչ միայն վարչապետն ու կառավարության անդամները, այլ նաեւ՝ պետական ծառայության շուրջ 20 հազար աշխատակիցներ: Այդ մասին սեպտեմբերի 22-ին ԱԺ-ում ճեպազրույցի ժամանակ հայտարարել է ԱԺ իշխող "Քաղաքացիական պայմանագիր" խմբակցության պատգամավոր Տարոն Չախոյանը, պատասխանելով հարցին, թե ինչպես է գնահատվելու քաղծառայողների աշխատանքի արդյունավետությունը, եւ արդյոք բացասական արդյունքների դեպքում նրանք կազատվեն զբաղեցրած պաշտոնից։
Տարոն Չախոյանի ասելով՝ 20 հազար պետծառայողների աշխատավարձերի ակնկալվող բարձրացման ֆոնին անազնիվ կլիներ նշել միայն կառավարության անդամների և ԱԺ պատգամավորների հավելավճարները: Օրինակ, բարձրացվելու են 1-ին կարգի մասնագետների, ավագ մասնագետների, վարչության պետերի, փոխնախարարների աշխատավարձերը և այլն: Միանգամայն հասկանալի է, որ փոխնախարարի աշխատավարձը չի կարող բարձր լինել նախարարի աշխատավարձից, ինչն էլ հանգեցրել է վերջինիս աշխատավարձի աճին: Եթե խոսքը գնում է իշխանության բարձրագույն էշելոնի մասին, ապա այս դեպքում կարելի է խոսել 200 անձանց մասին, բայց աշխատավարձը բարձրանում է 20 հազար մարդու համար։ Չախոյանը նկատել է, որ երկրում կան ընկերություններ, որոնց տնօրեններն ստանում են ամսական 20 մլն դրամ, և նրանց ոչ մի քաղցրաբլիթով չես գայթակղի 1 մլն դրամ աշխատավարձով փոխնախարար աշխատել:
Շարունակելով թեման՝ նույն խմբակցության պատգամավոր Էդուարդ Աղաջանյանը կոչ է արել հարցը դիտարկել կոռուպցիայի դրսևորումների հետ կոռելյացիայի մեջ: Այն երկրներում, որտեղ աշխատավարձը ցածր մակարդակի վրա է, այնտեղ կոռուպցիայի դրսևորումներն ավելի բարձր մակարդակի վրա են։ Օրինակ, Սինգապուրում պաշտոնյաների աշխատավարձերը շատ բարձր են, և, որպես հետևանք, այնտեղ կոռուպցիայի մակարդակը շատ ցածր է։ Աղաջանյանն ընդգծել է, որ պետական համակարգում որակյալ կադրերի արտահոսքի բավականին բարձր մակարդակ է դիտվում, և դրա պատճառը աշխատավարձերի անբավարար մակարդակն է: Նշենք, որ "Պետական պաշտոններ զբաղեցնող անձանց վարձատրության մասին" օրենքում կատարված փոփոխությունների համաձայն, ՀՀ վարչապետի աշխատավարձը կբարձրանա գրեթե 80 տոկոսով: Այժմ ՀՀ վարչապետի աշխատավարձը կազմում է 1 մլն 498 հազար դրամ (պետական ծառայողների աշխատավարձի բազային դրույքաչափը բազմապատկվում է 18 գործակցով): Ըստ օրինագծի՝ գործակիցը 18-ից կաճի մինչեւ 32, իսկ աշխատավարձը՝ մինչեւ 2 մլն 662 հազար դրամ: Վարչապետի աշխատավարձը հավասարվելու է նախագահի աշխատավարձին (նրա գործակիցը 20-ից դառնալու է 32)։
Նախարարների աշխատավարձերը կրկնակի կբարձրանան՝ մինչեւ 1 մլն 997 հազար դրամ։ Զգալի բարելավումներ են նախատեսված նաև քաղծառայողների հիերարխիայի մյուս աստիճանների համար։ Ավելի վաղ, ներկայացնելով օրինագիծը, փոխվարչապետ Տիգրան Խաչատրյանը նշել էր, որ օրինագիծը կդառնա պետական ծառայողների վարձատրության բարեփոխման շարունակությունը, որը սկսվել էր անցյալ տարի:
Քաղաքապետերի և համայնքապետերի աշխատավարձերը, որոնք այժմ կազմում են, միջին հաշվով, 350 հազար դրամ, կրկնապատկվելու են, որոշ դեպքերում ՝ եռապատկվելու, հայտարարել է տարածքային կառավարման նախարար Դավիթ Խուդաթյանը: Մունիցիպալ աշխատողների աշխատավարձի բարձրացումը կատարվելու է հանրապետության բյուջեից, այլ ոչ թե՝ մունիցիպալ։ Այդ նախագծի իրականացման համար երկրի բյուջեից տարեկան կուղղվի 25 մլրդ դրամ։
