ԱրմԻնֆո. Հայաստանը և Բուլղարիան մտադիր են խորացնել զբոսաշրջության ոլորտում համագործակցությունը: Այս մասին հայտնել է Հայաստանի զբոսաշրջության կոմիտեն՝ հղում անելով կոմիտեի ղեկավար Անուշիկ Ավետյանի և Բուլղարիայի զբոսաշրջության փոխնախարար Մարիելա Մոդևայի հանդիպմանը, որը տեղի է ունեցել Երևանում անցկացվող բժշկական զբոսաշրջության գլոբալ ֆորումի շրջանակներում:
Մասնավորապես, կողմերը քննարկել են փոխադարձ զբոսաշրջային հոսքերի ավելացման, փոխադարձ առաջխաղացման և նոր համատեղ նախաձեռնությունների իրականացման հնարավորությունները:
Հատուկ ուշադրություն է դարձվել բժշկական զբոսաշրջությանը որպես համագործակցության նոր և հեռանկարային ոլորտ: Կողմերը նաև ընդգծել են երկու երկրների միջև ուղիղ ավիափոխադրումների կարևորությունը: Մասնավորապես, քննարկվել է 2026 թվականի նոյեմբերի 7-ից Սոֆիա-Երևան-Սոֆիա ուղիղ չվերթների (GullivAir) վերսկսման հարցը, որը նոր հնարավորություններ է ստեղծում զբոսաշրջային կապերի զարգացման համար։
Ավետյանը և Մոդևան նաև ընդգծել են համագործակցության շարունակական պահպանման, երկու երկրներում անցկացվող միջոցառումների մասին տեղեկատվության փոխանակման և գործարար կապերի զարգացման կարևորությունը։
Նշենք, որ վիճակագրական կոմիտեի տվյալներով՝ հունվար-հունիս ամիսներին Բուլղարիայից Հայաստան է այցելել 1608 զբոսաշրջիկ, ինչը 56.9%-ով պակաս է նախորդ տարվա ցուցանիշից։
Նշենք նաև, որ հունգարական WizzAir ավիաընկերությունը հայտարարել է, որ 2027 թվականի հունիսի 6-ից շաբաթական երկու անգամ (հինգշաբթի և կիրակի օրերին) կսկսի չվերթներ իրականացնել Երևանից դեպի Բուլղարիա՝ Վառնա։
