ԱրմԻնֆո. «Էլեկտրոնային հաղորդակցության մասին» օրենքում և հարակից օրենքներում փոփոխությունների օրենսդրական փաթեթն ուղղված է կապի ոլորտի համալիր բարեփոխմանը, պետական վերահսկողության ուժեղացմանը, էլեկտրոնիկայի ստվերային շուկայի դեմ պայքարին և սպառողների իրավունքների ընդլայնմանը։ Սեպտեմբերի 30-ին ՀՀ Ազգային ժողովի տնտեսական հարցերի մշտական հանձնաժողովի նիստում քննարկվում են ՀՀ կառավարության կողմից առաջին ընթերցմամբ ներկայացված՝ վերոնշյալ փաթեթի փոփոխությունները։
Ներկայացնելով փոփոխությունները՝ ՀՀ բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանը նշել է, որ փոփոխությունները լրացուցիչ քննարկումների կարիք ունեն, ինչի կապակցությամբ խնդրել է փաստաթղթի ընդունման հարցը երկու ամսով հետաձգել։ Նախարարը նշել է, որ փաթեթի շրջանակում նախատեսվում է ստեղծել նոր ընկերություն, որը կստեղծվի հեռահաղորդակցության շուկայի օպերատորների մասնակցությամբ՝ բջջային հեռախոսների IMEI կոդերը վերահսկելու նպատակով։ Նոր ընկերության խնդիրների մեջ, մասնավորապես, կմտնի մատյանի ստեղծումը, որում կներկայացվեն հանրապետության տարածք օրինական ճանապարհով ներմուծված բոլոր բջջային հեռախոսները։ Ընկերությունը նաև պատժամիջոցներ կկիրառի այն հեռախոսների նկատմամբ, որոնք երկիր են ներմուծվել «մոխրագույն» սխեմայով։ «Սակայն պետք է նշեմ, որ փաթեթը հստակեցումների կարիք ունի, այդ թվում՝ տեխնիկական կարգավորումների մասով, և այդ կապակցությամբ խնդրում ենք երկու ամիս ժամկետ՝ բոլոր այս հարցերը լուծելու համար», - նշել է նախարարը։
Նշենք, որ օրենսդրական ակտով նախատեսված առանցքային փոփոխությունը բջջային հեռախոսների IMEI կոդերի գրանցման և վերահսկման միասնական պետական համակարգի ներդրումն է, որը լիարժեք պետք է գործարկվի 2027 թվականի հունվարի 1-ից։ Ներկայացված փաթեթի հիմնական նպատակն է պայքարը մոխրագույն ներմուծման դեմ, ինչը ենթադրում է IMEI-ի գրանցում։ 2027 թվականի հունվարի 1-ից Հայաստանի Հանրապետություն ապօրինի ճանապարհով ներմուծված բջջային հեռախոսները չեն ակտիվացվի և չեն աշխատի տեղական բջջային օպերատորների ցանցերում։ Փոփոխությունները կապի օպերատորներին պարտավորեցնում են ցանկացած ծառայություն միացնելիս ստուգել սարքի եզակի IMEI կոդը։ Եթե կոդը բացակայի օրինական ճանապարհով ներմուծված ապրանքների միասնական բազայում, սարքը ցանցին հասանելիություն չի ստանա։ 2025 և 2026 թվականների արտադրության հեռախոսների գրանցման համար կպահանջվի 3 000 դրամ պետական տուրքի վճարում։ Ավելի հին մոդելների սարքերը գրանցվում են անվճար։
Փոփոխությունների նպատակն է բացառել ստվերային շրջանառությունը, կանխել կեղծ կամ փոփոխված նույնացուցիչներով առևտուրը և ապահովել քաղաքացիների անձնական տվյալների կիբերանվտանգությունը։
