ԱրմԻնֆո. Հայաստանի կապի օպերատորների քառյակը 2026 թվականի հունվար-սեպտեմբեր ամիսներին պետական բյուջե է վճարել ավելի քան 33 մլրդ դրամ ($91.1 մլն)՝ տարեկան կտրվածքով 7,6% աճով (նախորդ տարվա 10% աճի դիմաց)։ Ինչպես վկայում են ՀՀ Պետական եկամուտների կոմիտեի տվյալները, այդ գումարից 8.8 մլրդ դրամը ստացվել է ուղղակի հարկերից (այդ թվում՝ շահութահարկից, եկամտահարկից), իսկ 14.8 մլրդ դրամը՝ ԱԱՀ-ից։
Արդեն չորրորդ տարին անընդմեջ Հայաստանի կապի օպերատորների շարքում առաջատարն է "Վիվա Արմենիա" ՓԲԸ-ն (Viva ապրանքանիշ), որը զբաղեցրել է 16-րդ տեղը (նախորդ տարվա 13-րդ տեղի դիմաց)։ Ընկերությունը 2026 թվականի հունվար-սեպտեմբեր ամիսներին պետական գանձարան է վճարել 14.7 մլրդ դրամ, որից 4.5 մլրդ դրամը՝ ուղղակի հարկերի գծով (այդ թվում՝ շահութահարկ, եկամտահարկ), իսկ 6.1 մլրդ դրամը՝ ԱԱՀ-ի գծով։
Այնուհետև UCom-ն է՝ զբաղեցնելով 27-րդ հորիզոնականը (նախորդ տարվա 31-րդ տեղի դիմաց) և հարկերի գծով պետական բյուջե վճարելով 9.1 մլրդ դրամ, որից 1.7 մլրդ դրամը՝ ուղղակի հարկերի գծով (այդ թվում՝ շահութահարկ, եկամտահարկ), իսկ 4.8 մլրդ դրամը՝ ԱԱՀ-ի գծով։
"Տելեկոմ Արմենիա"-ն (TEAM ապրանքանիշ) խոշորագույն հարկատուների ցանկում զբաղեցրել է 37-րդ տեղը (նախորդ տարվա 33-րդ տեղի դիմաց)՝ հարկերի գծով պետական բյուջե փոխանցելով 7.3 մլրդ դրամ, որից 1.7 մլրդ դրամը՝ ուղղակի հարկերի, իսկ 3 մլրդ դրամը՝ ԱԱՀ-ի գծով։
"Ջի Էն Սի Ալֆա"-ն (OVIO ապրանքանիշ) 214-րդ տեղից բարձրացել է 151-րդ հորիզոնական՝ հարկերի գծով պետական բյուջե վճարելով ավելի քան 1.8 մլրդ դրամ, որից 835.5 մլն դրամը՝ ուղղակի հարկերի (այդ թվում՝ շահութահարկ, եկամտահարկ), իսկ 840.3 մլն դրամը՝ ԱԱՀ-ի գծով։
1000 խոշոր հարկատուների հարկային մուտքերի ընդհանուր ծավալում Հայաստանի կապի օպերատորների քառյակի մասնաբաժինը տարվա ընթացքում աննշան նվազել է
- 2,1%-ից հասնելով 2%-ի։
Հիշեցնենք, որ 2025 թվականի հունվար-սեպտեմբեր ամիսներին կապի օպերատորների քառյակը հարկերի գծով պետական բյուջե էր վճարել 30.7 մլրդ դրամ ($80.4 մլն), այդ թվում՝ 8.3 մլրդ դրամ՝ ուղղակի հարկերի, իսկ 142 մլրդ դրամ՝ ԱԱՀ-ի գծով։ (2026 թվականի 30.09-ի դրությամբ ԱՄՆ դոլարի նկատմամբ դրամի հաշվարկային փոխարժեքը կազմել է 362,83 դրամ/$1)։
Նշենք, որ 2026 թվականի հուլիսի սկզբին "Վիվա Արմենիա" ՓԲԸ-ն հայտարարել էր Ovio ապրանքանիշով գործող "ՋԻԷՆՍԻ-ԱԼՖԱ" ՓԲԸ-ի բաժնետոմսերի ձեռքբերման գործարքի կնքման մասին։ Այս գործարքը Viva-ի զարգացման ռազմավարական քայլն է և ուղղված է ընկերության կողմից լիարժեք կոնվերգենտ հարթակի ձևավորմանը, որը մեկ միասնական էկոհամակարգում կմիավորի բջջային կապը, ֆիքսված ինտերնետը, հեռուստատեսությունը, հեռահաղորդակցական տրանսպորտային ենթակառուցվածքը և թվային ծառայությունները։ Ինչպես նշել է Viva-ի գլխավոր տնօրեն Արմեն Ավետիսյանը՝"Ovio-ի ձեռքբերումը Viva-ի համար ունի երկարաժամկետ ռազմավարական նշանակություն և լիովին համապատասխանում է թվային փոխակերպման, բիզնեսի դիվերսիֆիկացման և տեխնոլոգիական առաջնորդության ամրապնդման ընկերության ուղեգծին։ Մեր ռազմավարական առավելությունը թվային կոնվերգենցիան է։ Մենք հետևողականորեն ստեղծում ենք էկոհամակարգ, որում բջջային կապը, ֆիքսված ինտերնետը, հեռուստատեսությունը, ամպային, բովանդակային և այլ թվային ծառայությունները գործում են որպես մեկ ամբողջություն։ Սեփական ֆիքսված լանդշաֆտի ձևավորումն ու զարգացումը Viva-ին թույլ կտա զգալիորեն ուժեղացնել ոչ միայն ենթակառուցվածքային հնարավորությունները, այլև արտադրանքային առաջնորդությունը՝ ապահովելով արտադրանքային պորտֆելի առավելագույն դիվերսիֆիկացում և հաճախորդների փորձառության նոր մակարդակ"։ Viva-ի և Ovio-ի ցանցային ենթակառուցվածքների միավորումը կապահովի թողունակության աճ, տվյալների փոխանցման արագության, կապի որակի և հուսալիության բարձրացում։ Ցանցի միասնական կառավարումը թույլ կտա ավելի արագ միացնել ծառայությունները մասնավոր և բիզնես հաճախորդների համար, ավելի արդյունավետ զարգացնել բազային կայանների ենթակառուցվածքը և արագացնել կապի հաջորդ սերունդների տեխնոլոգիաների ներդրումը։ Գործարքը նաև կարևոր նշանակություն ունի Հայաստանի հեռահաղորդակցական կայունության համար։
