Արմինֆո. Հայաստանը շահագրգռված է Վրաստանի հետ բազմաոլորտ համագործակցության խորացմամբ։ Այդ մասին հայտարարել է ՀՀ տարածքային կառավարման և ենթակառուցվածքների նախարար Դավիթ Խուդաթյանը՝ նախօրեին Վրաստանի էկոնոմիկայի և կայուն զարգացման նախարար Մարիամ Կվրիվիշվիլիի հետ հանդիպման ժամանակ։
Մարիամ Կվրիվիշվիլին շնորհակալություն է հայտնել ջերմ ընդունելության համար և ընդգծել, որ Հայաստանը Վրաստանի ռազմավարական գործընկերն է: Հանդիպման ընթացքում քննարկվել են էներգետիկայի և տրանսպորտի ոլորտներում երկկողմ օրակարգային հարցեր: Խուդաթյանը նշել է, որ Հայաստանը մեծ նշանակություն է տալիս Հայաստանի և Վրաստանի միջև էլեկտրահաղորդման օդային գծի կառուցմանը, ինչը թույլ կտա մեծացնել էլեկտրաէներգիայի արտահանումը Վրաստան: Երկուստեք ընդգծվել է նաև ավիացիոն ոլորտի զարգացման կարևորությունը և Հայաստանի ու Վրաստանի քաղաքների միջև ուղիղ չվերթների անհրաժեշտությունը:
Միեւնույն ժամանակ, ինչպես հաղորդում է Վրաստանի էկոնոմիկայի նախարարությունը, Թբիլիսին խորհրդանշական գին է սահմանել Ադրբեջանից դեպի Հայաստան նավթամթերքի փոխադրման համար: 2025 թվականի դեկտեմբերի սկզբին Վրաստանը մեկանգամյա և անվճար ապահովեց Ադրբեջանից իր տարածքով նավթի տարանցումը դեպի Հայաստան, հաջորդ խմբաքանակը փոխադրվել է ստանդարտ սակագնով, ինչն առաջացրել էր Հայաստանի դժգոհությունը։ Սակագների թեման դարձել է էկոնոմիկայի եւ կայուն զարգացման նախարար Մարիամ Կվրիվիշվիլիի եւ ՀՀ տարածքային կառավարման եւ ենթակառուցվածքների նախարար Դավիթ Խուդաթյանի հանդիպման քննարկման գլխավոր թեման: Հայաստանի նախարարը շնորհակալություն է հայտնել վրացի գործընկերոջը Վրաստանի կառավարության բարեկամական որոշման համար, որի համաձայն, խորհրդանշական սակագնային դրույքաչափ է սահմանվել Ադրբեջանից դեպի Հայաստան նավթամթերքի փոխադրման համար:
