Հայաստանը մտադիր է խորացնել Չեռնոգորիայի հետ համագործակցությունը զբոսաշրջության ոլորտում. պատրաստվում է հուշագրի ստորագրում

Արմինֆո. ITB Berlin 2026 միջազգային ցուցահանդեսի շրջանակում ՀՀ ԷՆ Զբոսաշրջության կոմիտեի նախագահ Լուսինե Գևորգյանը հանդիպել է Չեռնոգորիայի զբոսաշրջության նախարար Սիմոնիդա Կորդիչին։

Զբոսաշրջության կոմիտեի հաղորդագրության համաձայն, հանդիպման ընթացքում քննարկվել են երկկողմ զբոսաշրջային համագործակցության հարցեր, այդ թվում՝ վիզային ռեժիմի փոփոխությունները, զբոսաշրջային վիճակագրությունը և ոլորտի վերջին զարգացումները։

Անդրադարձ է կատարվել թվայնացման և արհեստական բանականության գործիքների կիրառմանը, ինչպես նաև միջազգային ցուցահանդեսների, փառատոների և այլ միջոցառումների շրջանակում համագործակցության հնարավորություններին։

Կարևորվել է ուղիղ չվերթների մեկնարկը դեպի Տիվատ 2026 թվականին, որը կնպաստի զբոսաշրջային հոսքերի աճին։

Հայկական կողմը ներկայացրել է զբոսաշրջության ոլորտում համագործակցության հուշագրի նախագիծը՝ միտված երկկողմ կապերի խորացմանը և զբոսաշրջության կայուն զարգացմանը։

Նշենք, որ ՀՀ վիճակագրական կոմիտեի տվյալներով ՝ 2025 թվականին Չեռնոգորիայից Հայաստան է այցելել ընդամենը 399 զբոսաշրջիկ, ինչը 2.5 անգամ գերազանցում է 2024 թվականի ցուցանիշը։