Արմինֆո. Հայաստանում արտադրված գյուղատնտեսական ապրանքների առաջին փորձնական խմբաքանակն ուղարկվել է այլընտրանքային երթուղիներով։ Այս մասին նախընտրական քարոզարշավի ժամանակ հայտարարել է ՀՀ վարչապետ Նիկոլ Փաշինյանը։
Նրա խոսքով՝ այս ուղղությամբ աշխատում են մի քանի գործարար պատվիրակություններ։ Ամեն դեպքում, նշել է Փաշինյանը, Երևանը չի գնա Մոսկվայի հետ հակամարտության, բոլոր խնդիրները կլուծվեն հանգիստ մթնոլորտում։ «Ես ունեմ ազդեցության լծակներ, ես կգնամ, ես կլուծեմ այդ խնդիրները»,- ասել է վարչապետը։
Նա նաև նշել է, որ Հայաստանը դառնում է ժամանակակից տեխնոլոգիաների և արհեստական բանականության կենտրոն՝ ընդգծելով, որ վերջին տարիներին իրականացված ծրագրերն արդեն իսկ շոշափելի արդյունքներ են տալիս։ Փաշինյանն անդրադարձել է 2025 թվականի օգոստոսի 8-ին ԱՄՆ նախագահ Դոնալդ Թրամփի հետ ստորագրված փոխըմբռնման երեք հուշագրերին, որոնցից մեկը վերաբերում էր արհեստական բանականության ոլորտում համագործակցությանը։ Վարչապետի խոսքով՝ այն ժամանակ քննադատություն էր հնչում ստորագրված փաստաթղթերի գործնական նշանակության բացակայության վերաբերյալ։ «Ի՞նչ էին նրանք ասում։ Ասում էին, որ դա մի կտոր թուղթ է, որը չունի իրավական ուժ, չունի հետևանքներ, անիմաստ փաստաթուղթ է, որը ստորագրվել է PR նպատակներով»,- նշել է նա։ Սակայն, ըստ վարչապետի, անցած ժամանակահատվածում արդեն իսկ արձանագրվել են կոնկրետ արդյունքներ։ «Ի՞նչ ենք տեսնում այսօր։ Չի անցել նույնիսկ մեկ տարի, իսկ մենք արդեն ունենք արհեստական բանականության կենտրոն Երևանի պետական համալսարանում, և արդեն բացվել է արհեստական բանականության առաջին ֆաբրիկան Գեղարքունիքի մարզի Գագարին համայնքում»,- ասել է Փաշինյանը։
Նրա խոսքով՝ տեխնոլոգիական ոլորտում առաջընթացը փոխկապակցված է նաև գիտության զարգացմանն ուղղված պետական քաղաքականության հետ։ Փաշինյանը հիշեցրել է, որ վերջին տարիներին զգալիորեն ավելացել է գիտության ֆինանսավորումը և բարձրացել են աշխատավարձերը գիտական ոլորտում։ Նա ընդգծել է, որ պետությունը ներդրումներ է կատարել նաև ռազմաարդյունաբերական համալիրի զարգացման մեջ՝ նշելով, որ այդ քայլերը նպաստել են նոր տեխնոլոգիաների ստեղծմանն ու կիրառմանը։ Նրա խոսքով՝ այսօր Հայաստանի ռազմաարդյունաբերական համալիրի ընկերություններն արդեն արտադրանք և զենք են արտահանում զարգացած երկրներ։
Վարչապետը նաև նշել է, որ մայիսի 28-ին Հանրապետության հրապարակում կայացած զինվորական շքերթի ժամանակ ցուցադրվել են ինչպես տարբեր երկրներում արտադրված ժամանակակից զենքեր, այնպես էլ Հայաստանում արտադրված զինատեսակների մի շարք նմուշներ, ինչը նույնպես վկայում է երկրի տեխնոլոգիական ներուժի աճի մասին։
