Արմինֆո.ՀՀ առողջապահության նախարար Անահիտ Ավանեսյանն օգոստոսի 21-ին հանդիպել է գործատուների հետ։ Ինչպես հաղորդում է Առողջապահության նախարարության մամուլի ծառայությունը, հանդիպման նպատակը 200 000 դրամից պակաս աշխատավարձ ստացող աշխատողների առողջության ապահովագրության համակարգ ընդգրկման ընթացակարգի քննարկումն էր։
Նախարարը ներկայացրել է նախագիծը, ըստ որի, պետք է ձևավորվի ապահովագրավճարը։
Համաձայն նախագծի՝ 200 000 դրամից պակաս աշխատավարձ ստացող աշխատողը 2027 թվականին յուրաքանչյուր ամիս որպես ապահովագրավճար պետք է վճարի 2000 դրամ, 4400 դրամը կսուբսիդավորի պետությունը, իսկ 4400 դրամը պետք է վճարի գործատուն։
Այս ձևաչափի նպատակը մինչև 200 000 դրամ ստացող քաղաքացիների՝ ապահովագրության համակարգ ներգրավմամբ նրանց ֆինանսական բեռի կտրուկ աճի զսպումն է։
Հանդիպմանը ներկա հաշվապահները, ընկերությունների ֆինանսական պատասխանատուները հանդես են եկել տասնյակ հարցերով, դիտարկումներով ու առաջարկներով ։
Անահիտ Ավանեսյանը, կարևորելով մասնագետների դիտարկումները, նշել է, որ հենց դրանք հաշվի առնելու նպատակով է, որ բարեփոխման յուրաքանչյուր հատվածի դեռևս սկզբնական՝ նախագծային փուլում են նման հանդիպումները նախաձեռնվում։ Անահիտ Ավանեսյանը բարձր է գնահատել ապահովագրության ներդրման պահից սկսած այս մասնագետների կատարած աշխատանքը, ընդգծելով, որ այն բավականին լայնածավալ էր՝ մասնագիտական հմտություն ու ճկունություն պահանջող։
Նախարարությունը նշում է, որ նման հանդիպումները շարունակական կլինեն նաև առցանց տարբերակով՝ մինչև ապահովագրության՝ բոլոր փուլերով ամբողջական ներդրումը։
Հայաստանում առողջության համընդհանուր ապահովագրության համակարգի փուլային ներդրումը մեկնարկել է 2026 թվականի հունվարից։ Ներդրումը նախատեսված է փուլային անցման համար և տևում է մի քանի տարի։ Առաջին փուլում պարտադիր ապահովագրությունն, առաջին հերթին, ընդգրկում է բնակչության խոցելի խմբերին, ներառյալ մինչև 18 տարեկան երեխաներին և 65 տարեկանից բարձր անձանց: 2026 թվականի ապահովագրի բազային գինը սահմանվել է տարեկան 129,6 հազար դրամ (ամսական մոտ 10 800 դրամ), ընդ որում, միջոցների մի մասը փոխհատուցվում է պետության կողմից։ Այն անձինք, որոնց ամսական եկամուտը գերազանցում է 200 հազար դրամը, ապահովագրավճարը վճարում են ինքնուրույն: Ծառայությունների փաթեթը ներառում է բժշկական ծառայությունների մեծ մասը (բացառությամբ ատամնաբուժության և պլաստիկ վիրաբուժության): Ծրագրի իրականացման համար ստեղծվել է Առողջության համընդհանուր ապահովագրության հիմնադրամ, համագործակցության մեջ ներգրավվել են հանրապետության առաջատար ապահովագրական ընկերությունները:
