ԱրմԻնֆո. COP-17-ին մասնակցելու նպատակով Երևան ժամանող 74 ամենաքիչ զարգացած և փոքր կղզիական զարգացող պետությունների բարձրաստիճան ներկայացուցիչների ծախսերը հոգալու համար կառավարության պահուստային ֆոնդից կհատկացվի 93,5 մլն դրամ։ Այս մասին որոշումն ընդունվել է սեպտեմբերի 11-ին կառավարության նիստում։
Որոշման նախագծի հիմնավորման մեջ ընդգծվում է, որ 2025 թվականին Նյու Յորքում ՀՀ կառավարության և Կենսաբանական բազմազանության մասին ՄԱԿ-ի կոնվենցիայի քարտուղարության միջև ստորագրված համաձայնագրի համաձայն՝ ընդունող կողմը ֆինանսավորելու է 74 ամենաքիչ զարգացած երկրների և փոքր կղզիական զարգացող պետությունների բարձրաստիճան ներկայացուցիչների մասնակցության ծախսերը։ 2026 թվականի հոկտեմբերի 27-28-ը Երևանում կայանալիք COP-17-ի բարձր մակարդակի հատվածին մասնակցելու համար առաջարկվում է ֆինանսավորել վերոնշյալ երկրներից յուրաքանչյուրից մեկ բարձրաստիճան պատվիրակի (նախարարական մակարդակով) ծախսերը։
COP-17-ի բարձր մակարդակի հատվածին 74 երկրների բարձրաստիճան ներկայացուցիչների մասնակցության ծախսերը ներառում են ավիատոմսերը և մինչև 3 օր ժամկետով Երևան գործուղումը։ Բարձրաստիճան ներկայացուցիչների՝ Երևան գործուղման ծախսերի հաշվարկը հիմնված է 2026 թվականի հուլիսին հրապարակված ՄԱԿ-ի օրապահիկի վերաբերյալ շրջաբերականի վրա, որի համաձայն՝ Երևանում մեկ գիշերվա համար սահմանվում է 213 ԱՄՆ դոլար։ Մեկ պատվիրակի ավիատոմսի միջին արժեքը դրամով կազմում է 2500 ԱՄՆ դոլար։ Ռիսկերը նվազեցնելու նպատակով (փոխարժեքի տատանումներ կամ ավիատոմսի միջին գնից շեղումներ) հաշվի են առնվել նաև 10% չափով չնախատեսված ծախսեր։ Հաշվարկը կատարվել է Հայաստանի Հանրապետության Կենտրոնական բանկի կողմից՝ 2026 թվականի հուլիսի 27-ի դրությամբ սահմանված ԱՄՆ դոլարի միջին փոխարժեքով (365,87 դրամ)։
